Úthlutað hefur verið úr Samfélagssjóði HS Orku en 70 umsóknir bárust í sjóðinn fyrir ýmis verðug verkefni. Af þeim hlutu 10 styrk í þessari fyrri úthlutun ársins. Meðal verkefna sem eru styrkt að þessu sinni eru uppbygging Fab-Lab á Suðurnesjum, Menntunarsjóður Mæðrastyrksnefndar Reykjavíkur, sviðslistaverkefni á vegum Ungleikhúss Reykjanesbæjar og verkefnið „Get together“ á vegum GETA hjálparsamtaka.
Samfélagssjóðurinn styrkir verkefni sem geta haft jákvæð áhrif á íslenskt samfélag, lífsgæði og mannlíf. Styrkir eru veittir til skýrt skilgreindra verkefna eða atburða. Tekið er á móti umsóknum um styrki frá öllum landshlutum en sérstök áhersla er lögð á að styðja verkefni í nágrannabyggðum starfsstöðva fyrirtækisins. Við val á verkefnum er m.a. litið til þeirra heimsmarkmiða um sjálfbæra þróun sem HS Orka hefur valið fyrir starfsemi sína.
Seinni styrkúthlutun ársins er áætluð þann 15. október og opið verður fyrir umsóknir frá 1.-30. september næstkomandi.
Verkefni sem hljóta styrk úr sjóðnum í maí 2023:
- Byggðasafn Hafnarfjarðar – Fyrsta almenningsrafveitan á Íslandi
- Fjölbrautaskóli Suðurnesja – Fab-Lab Suðurnesja
- GETA hjálparsamtök – „Get together“
- Hákarlar við Ísland – Hákarlar í skólastofunni
- Kraftur stuðningsfélag – Fjölskylduviðburðir
- Mæðrastyrksnefnd Reykjavíkur – Menntunarsjóður
- Stóru-Vogaskóli – Kajakar fyrir námsbraut
- Sveinssafn í Krýsuvík – Demantshringur og þróun sýningarstarfs
- Ungleikhús Reykjanesbæjar – Sviðslistasýningin Annie Jr.
- Ungmennafélagið Leifur heppni – Uppbygging Krossneslaugar
