Stofnaður hefur verið Rannsóknarsjóður HS Orku og verður í fyrsta sinn úthlutað úr sjóðnum í mars á þessu ári. Sjóðurinn er settur á laggirnar í þeim tilgangi að efla þekkingargrunn innan HS Orku og stuðla að framförum og nýsköpun í starfsemi fyrirtækisins. Opnað verður fyrir umsóknir um miðjan þennan mánuð.
Veittir verða styrkir til rannsóknarverkefna sem hafa skírskotun til starfsemi HS Orku eða sjálfbærniáherslna fyrirtækisins. Í sjálfbærnistefnu HS Orku er hægt að kynna sér betur sýn fyrirtækisins og þau heimsmarkmið sem unnið er eftir til að ná árangri á sviði sjálfbærni.
Rannsóknarsjóðurinn styður einkum við verkefni á háskólastigi og samstarfsverkefni við þekkingarstofnanir og aðra sérfræðinga en allar umsóknir sem uppfylla úthlutunarviðmið sjóðsins verða yfirfarnar og metnar. Viðfangsefnin geta til að mynda tengst jarðvísindum, verkfræði, tæknifræði, iðngreinum, endurnýjanlegri orkuframleiðslu, náttúrufræðum, sjálfbærni, jafnrétti og samfélagsmálum svo eitthvað sé nefnt.
Opnað verður fyrir umsóknir í sjóðinn þann 15. janúar og verður gáttin opin í einn mánuð eða til og með 15. febrúar næstkomandi. Fagráð Rannsóknarsjóðsins fer yfir umsóknirnar og tekur endanlega ákvörðun um úthlutanir en þær fara fram í marsmánuði, eins og áður segir.
Hér á vefsíðu HS Orku er hægt að kynna sér úthlutunarviðmið sjóðsins auk þess sem þar verður hægt að nálgast umsóknarhlekk frá og með 15. janúar.
