Almannavarnir og HS Orka undirbúa nú lagningu nýrrar hjáveitulagnar fyrir heitt vatn yfir nýja hraunið við Njarðvíkuræðina, sem fór í sundur í hraunflæði á fimmtudag. Umfangsmiklar viðgerðir í kjölfarið báru ekki þann árangur sem að var stefnt og ný hjáveitulögn sem liggur undir hrauninu rofnaði seint í gærkvöldi.
Síðastliðin nótt var nýtt til að hefja efnisöflun og skipuleggja flutninga á því. Lagður verður vegur yfir nýja hraunið og er vegagerð þegar hafin. Suðustöðvar verða settar upp og unnið verður á vöktum. Talið er að leggja þurfi um 600 metra af nýrri lögn. Þegar er byrjað að keyra nýju lagnaefni á staðinn. Framkvæmdin mun taka nokkra daga og enn er of snemmt að áætla verklok.
Vegagerð verður á hendi almannavarna en stórvirkar vinnuvélar munu brjóta hraunið upp, þjappa það niður og leggja malarpúða ofan á þvert yfir hraunið. Fyllsta öryggis verður gætt við framkvæmdina.
HS Orka undirbýr suðuvinnuna í samstarfi við ýmsa verktaka. Útbúa þarf vinnuplön, flytja suðuvélar á svæðið, setja upp suðutjöld og skipuleggja vaktir svo unnt sé að vinna allan sólarhringinn.
Talsvert efni til framkvæmdanna er þegar tiltækt í landinu auk þess sem efni verður flutt inn. Hanna þarf nýjar millitengingar og hefja smíði á þeim en þær verða nýttar til að tengjast Njarðvíkuræðinni, sem liggur ofanjarðar sitt hvorum megin við hrauntunguna.
Ljóst er að framkvæmdin er afar umfangsmikil almannavarnaaðgerð og nokkurn tíma mun taka áður en hægt verður að segja fyrir um möguleg verklok. Allt kapp verður lagt á að vinna verkið eins hratt og nokkur kostur er.
