Öll framleiðsla vatns og rafmagns í Svartsengi er eðlileg sem stendur en viðbragð HS Orku er virkt á neyðarstigi, neyðarstjórn er að störfum og starfsmenn í Reykjanesvirkjun fylgjast grannt með framvindu mála. Líkur á eldgosi á Reykjanesskaga eru verulegar að mati sérfræðinga Veðurstofu Íslands og var Grindavíkurbær rýmdur í nótt í ljósi þess.
Athafnasvæði fyrirtækisins í Svartsengi eru mannlaus og starfsmenn fara ekki inn á svæðið nema brýna nauðsyn beri til og í góðu samráði við almannavarnir ríkislögreglustjóra. Verktakar og vélar eru til taks á vegum almannavarna ef og þegar hafist verður handa við gerð varnarmannvirkja á svæðinu. Í þeim aðstæðum sem uppi eru nú er í forgrunni að tryggja öryggi þeirra sem hugsanlega þurfa að bregðast við bilunum eða truflunum í rekstri orkuversins.
Rafmagnslaust varð í Grindavík um tíma í morgun vegna bilunar í veitukerfi HS Veitna en rafmagn er komið á að mestu. Einnig fór lögn í sundur í dreifikerfi kalda vatnsins hjá Grindavíkurbæ og vinnur vatnsveita bæjarins að viðgerð.
Landsnet færði varaaflsvélar sínar frá Grindavík í morgun í samráði við almannavarnadeild ríkislögreglustjóra til að forðast mögulegt tjón með hliðsjón af ólíkum sviðsmyndum sem nú er unnið út frá og því að bærinn hefur verið rýmdur. Landsnet telur að ekki taki langan tíma að koma þeim aftur þangað sem þeirra verður þörf í samstarfi við HS Orku og HS Veitur.