Á dögunum tóku auðlindasérfræðingar HS Orku á móti hópi breskra og bandarískra vísindamanna sem vinna að því að þróa gas- og hitaskynjara fyrir Geimferðastofnun Bandaríkjanna, NASA, til notkunar á yfirborði Venus. Prófanirnar fóru fram á starfssvæði HS Orku í Svartsengi. Vísindamenn í hópnum hafa einnig unnið að hönnun skynjara til notkunar á Mars og Títan.
Valdís Guðmundsdóttir, verkefnastjóri í auðlindastýringu HS Orku, var meðal þeirra sem leiðsagði hópnum um Svartsengi. „Þetta snerist um að prófa búnaðinn í eldfjallafumhverfi þar sem er að finna gös og hita. Þeir prófuðu hitaskynjarana í nýja hrauninu við Fagradalsfjall en vantaði að prófa gasskynjarana á hentugum stað. Það var hreinlegt og fljótlegt fyrir þá að setja upp græjurnar við lögn hjá okkur og þar fengu þeir allt staðfest sem þeir vildu.“
Á Venus er hitinn um 465°C, þrýstingurinn 90 bör og andrúmsloftið gerólíkt því sem er á jörðinni. Reyndust aðstæður við lagnirnar á Reykjanesi nægilega líkar því umhverfi til þess að prófanir á gasskynjurum gætu farið þar fram. Tækjabúnaðurinn stóð undir væntingum og prófanirnar gengu hratt og vel fyrir sig. Fyrir áhugasama má hér fræðast frekar um NASA-verkefnið á Venus.
Á meðfylgjandi mynd má sjá Kevin Baines (Jet Propulsion Laboratory, NASA), Frank Wangberg (Makel Engineering), Darby Makel (Makel Engineering), James Makel (Makel Engineering), Will Moreland (Háskóli Íslands) og Ashley Davies (JPL). Með í för var einnig Þorvaldur Þórðarson, eldfjallafræðingur við Háskóla Íslands en skólinn var hópnum innan handar í verkefninu.
