HS Orka verður bakhjarl heimsþings kvenleiðtoga (Reykjavík Global Forum – Women Leaders) sem haldið verður í Hörpu í nóvember. Heimsþingið hefur verið haldið í Reykjavík undanfarin fjögur ár í samstarfi við ríkisstjórn Íslands, Alþingi og Women Plitical Leaders ásamt þátttöku fjölda íslenskra og alþjóðlegra samstarfsaðila. Áhugi á þinginu er mikill og þingið sjálft vakið alþjóðlega athygli enda vel sótt af fulltrúum frá um 100 mismunandi löndum. Stærstur hluti þinggesta eru alþjóðlegir kvenleiðtogar úr stjórnmálum og atvinnulífi þessara landa.
Yfirskrift Heimsþingsins er „Power, Together“ sem vísar til þess hvernig hægt er að ná fram breytingum og stuðla að betri heimi með aukinni aðkomu kvenna að ákvörðunartöku, stefnumótun og forystu. HS Orka hefur lagt mikla áherslu á jafnrétti í starfsemi sinni og unnið markvisst að því að jafna hlutfall kynjanna meðal starfsmanna. Í rekstri orkufyrirtækja hefur það reynst þó nokkur áskorun en umtalsverður árangur hefur náðst síðustu ár. Í dag eru jöfn kynjahlutföll í stjórn HS Orku og þrír af sjö framkvæmdastjórum félagsins eru konur.
Á þinginu er mikil áhersla lögð á að draga úr sóun og lágmarka áhrifin á umhverfið sem fellur mjög vel að hugmyndafræði HS Orku og Auðlindagarðsins.