Allt kapp verður lagt á að tryggja órofna starfsemi orkuversins í Svartsengi ef til eldgoss kemur í eða í grennd við Svartsengi. Í forgangi verður ávallt að tryggja öryggi starfsfólks og verktaka á svæðinu.
Forsvarsmenn HS Orku kynntu varnir fyrirtækisins fyrir íbúum Grindavíkur á upplýsingafundi bæjaryfirvalda, sem fram fór í íþróttahúsinu í Grindavík síðdegis í gær vegna jarðhræringanna á Reykjanesi. Þar fluttu fulltrúar Veðurstofunnar, lögreglu, HS Veitna og Heilbrigðisstofnunar Suðurnesja einnig erindi og sátu fyrir svörum í pallborði ásamt fleiri viðbragðsaðilum.
Sívöktun á borholum
Kristinn Harðarson, framkvæmdastjóri framleiðslu, kynnti fyrir íbúum hver undirbúningur fyrirtækisins hefur verið í því óvissuástandi sem ríkt hefur síðan 25. nóvember. Neyðarstjórn HS Orku var þá virkjuð og viðbragðsáætlanir yfirfarnar. Öryggi starfsfólks og verktaka er í fyrirrúmi en samhliða eru borholur í Svartsengi í stöðugri vöktun, loftgæði eru mæld, mælingar á heitu vatni fara fram daglega og öll áhersla er lögð á að starfsemi í orkuverinu rofni ekki.
Ef versta sviðsmyndin raungerist
Fyrirtækið hefur í samstarfi við HS Veitur dregið upp ólíkar sviðsmyndir og ef sú versta raungerist og eldgos verður í grennd við Svartsengi er ljóst að stórtjón getur orðið á innviðum vegna hraunflæðis. Rafmagn er leitt um Svartsengi til Grindavíkur og kalt vatn kemur frá vatnsupptökusvæðinu við Lága. Heitt vatn er síðan framleitt í Svartsengi sem dreift er til allra sveitarfélaga á Suðurnesjum. Gera þarf ráð fyrir því í viðbragðsáætlunum fyrirtækisins og almannavarna að hraunflæði ógni starfseminni í Svartsengi og geri hitaveituna með öllu óstarfhæfa á þjónustusvæði með um 30.000 íbúa.
Innviðahópur hins opinbera
Kristinn greindi frá því á fundinum að umtalsverð kortlagning á stöðunni hefur farið fram í starfshópi á vegum hins opinbera um varnir mikilvægra innviða. Komi til þess að innviðum í Svartsengi er ógnað mun HS Orka vinna með almannavörnum að uppsetningu varnar- og leiðigarða auk þess að fergja lagnir. Áhersla verður jafnframt á að verja borholur á svæðinu svo unnt verði að taka þær aftur í notkun að eldgosi loknu.
Gott samstarf í héraði
Samstarfshópur HS Orku og HS Veitna er að störfum og vinnur að hugsanlegum lausnum til skamms tíma en einnig er horft til lausna til lengri tíma sem brúa þyrftu bilið þar til hitaveita yrði starfhæf á ný á svæðinu. Ljóst er að hið opinbera mun þurfa að koma í ríkum mæli að slíkum lausnum og tryggja að nauðsynlegur varabúnaður sé fyrir hendi á neyðartímum.